بعض النصائح للحفاظ علي جهاز الرسيفر
السلام عليكم ورحمة الله وبركاته
أهلا وسهلا بكم زوار موقع الاختيار للالكترونيات
فيما يلي نستعرض لحضراتكم بعض النصائح لكي تحافظون علي أجهزة الرسيفر من التلف ولكي يعمل الجهاز بكامل كفائته من دون أية مشاكل وأيضاً نظراً لارتفاع الأسعار أصبح الحفاظ علي الاجهزة بشكل عام أمر ضروري ومن بين هذه الأجهزة جهاز الرسيفر
والآن نقدم لكم هذه النصائح لكي تساعدكم في ذلك.
1- ماتغطيش الرسيفر نهائيا والا تحط أي حاجة فوقه والا تحطه علي التليفزيون عشان الرسيفر درجة حرارته ماتعلاش ويبتدي الرسيفر يهنج معاك ويعطل
2- رتب القنوات ترتيب مظبوط واحذف القنوات اللي مش شغالة ومتعملش بحث علي القنوات علي طول وتسيب القنوات القديمة موجودة وتلاقي القناة متكررة اكتر من مرة احذف القنوات القديمة الأول وبعد كده اعمل بحث جديد عشان متأثرش علي أداء الرسيفر
3- ماتضغطش علي الريموت بشكل سريع اكتر من مرة وادي فرصة للرسيفر لمعالجة الأمر اللي إدتهوله
4- ماتحطش الرسيفر قريب من التكيف أو تعرضه لتيارات هواء مباشرة ولا تركب مروحة تبريد عشان الرطوبة بتأثر علي العناصر الإلكترونية اللي موجودة في البردة
5- ماتسيبش الرسيفر قريب من الأطفال عشان الطفل عنده الفضول انه يكتشف أي حاجة ومعندوش فكرة عن خطورة الأجهزة اللي حواليه فاممكن يشد الرسيفر يوقعه علي الارض أو يلعب بيه
6- الطبق لازم تتأكد انه يكون راكب بشكل صحيح تماما عشان ميأثر علي الإشارة في الرسيفر وأهم حاجة لازم تتأكد من السلك انه مايكونش فيه قفلة والصامولتين f connector راكبين في السلك مظبوطين مية في المية علشان دول بيتسببوا في حرق الرسيفر
7- ماتركبش أكتر من شاشة أو تليفزيون علي عدسة واحدة لأن ده غلط جدا وبيأثر علي الأجهزة بشكل كبير لازم تركب لكل شاشة طبق أو تجيب عدسة بأكتر من مخرج
8- ماتشتريش سلك من الأنواع الرديئة دايما هات سلك من النوع النضيف عشان السلك ليه دور كبير في جودة الإشارة وأداء الجهاز
وحاول علي قد ما تقدر انك ماتلحمش السلك ولو مضطر تلحم الحم لحام نضيف عشان متأثرش علي الإشارة
9- ماتسيبش الرسيفر شغال لمدة طويلة لازم تريحه من وقت للتاني وماتطفيش الرسيفر من الريموت وتسيب الكهرباء شغالة فيه لمدة طويلة لازم بعد ماتطفي الرسيفر من الريموت تشيل الفيشة من الكهرباء
10- من الحجات اللي بتأثر علي الرسيفر كمان هو مشترك الكهرباء ماتجبش مشترك خامته رديئة لأن المشتركات الرديئة من الأسباب الرئيسة في أعطال الرسيفر والشاشات.
أخيرا نتمنى أن تكونوا استفدتوا من هذه المعلومات ،يسعدنا جدا تلقي مشاركاتم من خلال التعليقات بالأسفل
أيضا نقدر كل التقدير محولاتكم لتوصيل هذا المنشور للأخرين لكي تعم الفائدة......
شكراً لكم والي اللقاء في موضوع جديد..